Bishaan burqaa jireenyaati
Kan lapheefi lafa goggoge jiisu
Dachee magarisomsee
Kan lubbuu gammachiisu
Garuu…
Naannoon qulqullina dhabee
Gaafa balfaan faalamu
Bishaan lubbuuf sooratan
Gaafa xuriin dhaalamu
Dhukkuba daddarbaatu
Qe’ee nama hundaa lixa
Lubbuu namaafi bineeldaa
Du’aan lafarraa fixa
–
Xiqqaafi guddaan wal dhageenyee
Amaanaadhaan gadi teenyee
Ollaa bitaafi mirgaa dhaggeefannee
Rakkoo jiru furuuf murteeffanne
Amaanaa jennee kaanee
Hojiitti yoo bobbaane
Biqiltuu haaraa dhaabnee
Kan jiru kunuunsina
Lubbuu du’a baraarree
Dacheeyyuu misoomsina
Seenaa goonee dubbanna
Hongeefi beela har’aa
Tokkuummaadhaan yoo kaane
Qee’ee qulqulluu ijaarraa.
.
Hongeedhaan rukutamnee
Qilleensa ga’aa dhabnee
Aduu hamaan nu dhaanee
Coollignee gadi cabnee
.
Saawwan keenya gu’anii
Oyiruun keenya qaaqa’ee
Laagaan nu babbaqaqee
Gogiinsi nu gaaga’ee
.
Harka keenya bal’ifnee
Daangaa ormaatti ceenee
Utuu kadhachuuf dhaqnee
Qilleensa jiidhaa feenee
.
Asiifi achii wal waamaa
Wal tuttuqanii ceekuu
Garaasaanii qabatanii
Gaaffii keenyatti seequ
Rakkina isa akkasii
Dafqee hojjetata abbaatu
Ollaan soorata malee
Qilleensa namaa hin laatu
Qilleensa dhabnaanimmoo
Ni qoora lagni keenya
Fala jireenyaa dhabneetu
Harka marannee teenya
.
Yoo qilleensi hin jiraanne
Bishaan hin jiru tiru
Bishaan hin jiru jechuun
Lubbuun gonkuma hin jiru
.
Kanaaf bishaan bu’uura
Bishaan malee hin jiraannu
Bishaan akka jiraatuufimmoo
Biqiltuuf dursa haa laannu
Fayyaafi nagaan jiraachuuf
Waktii bonaafi gannaa
Qe’ee keenya kunuunsinee
Qulqullinaan eegganna.
siifsiin 